Algemiene Anfieter Award (körtweg Anfieterpries) 2011

ASSEN - Drenthe - In het radioprogramma “Hemmeltied” van RTV Drenthede wordt op zaoterdag 7 annewaori detoekenning bekendmaokt van de Algemiene Anfieter Award (körtweg Anfieterpries) 2011. Al veur de zeuvende maol. Daornaost reikte het Geneutschap tot twei jaor leden ok de  Zoorholtpries uut. Die wordt toekend an die persoon of instelling die de Drèentse streektaol  achteruut hölpen hef.

Het zoorholt ( letterlijk: dor holt) weur vrogger anbeuden an een wichie dat deur heur vrijer in de steek laoten was. De pries stiet dus veur het in de steek laoten van de streektaol, maor kan ok zien worden as opstap naor een beter leven. De Anfieterpries wordt uutreikt an die persoon of instelling die zich in 2011 slim inzet hef veur de streektaol in Drenthe. De volmachten hebt goed neis. De ofschrikwekkende warking van de Zoorholtpries, benaom de ieuwige schaande die der an vast zit, hef het tal van kandidaoten ok dit jaor slim mindern laoten. Der dök hier en daor wel een kraant of een instelling op die het niet zo nauw nemp met de spelling van het Drèents (kroamschudden in stee van kraomschudden, we bent –blikstienkaters nog an toe!- gien Grunnigers, schaom joe daor in Rune bij de schaopskudde!), maor we wilt niet op alle slakken zolt smieten. Dat der bent dit jaor gien echte zwaore kandidaoten. Dus we reikt de Zoorholtpries vanneis niet uut! Het goeie neis is ok dat der aal meer dingen bent die in anmerking kommen kunt veur de Anfieterpries. Bedrieven die de streektaol gebruukt, gemientes die der wat met doet en zölfs nei-Drenten die as een laans breekt veur het Drèents. Nao diepgaond beraod hef het Geneutschap de volgende personen en instellings nomineerd veur de Anfieterpries:
  1. Burgemeester Erik van Oosterhout van Aa en Hunze, die gien gelegenheid onbenut lat om het belang van de streektaol te benaodrukken.
  2. De PeerGroup uut Dondern, wel as slim an de weg timmerd hef met de Drèntse Bluesopera. Dizze opera, waorvan het idee kwam uut de boedel van de Stichting Drentse Muziekmaatschappij onder veurzitterschap van Egbert Meijers, is met veul succes opvoerd in Gieten en zölfs in Amsterdam.
  3. De gemiente Noordenveld, wel as in de uutbreiding Roderveld IV de straoten Drèentstaolige vogelnaomen geven hef.
  De jury, onder veurzitterschap van Hans Jalvingh, taolschulte van Assen, zal de nominaoties kört toelichten veur de uutreiking. De pries bestiet uut een toepasselijk sierveurwarp en langdurige, zo niet iewige, roem. De Algemiene Anfieter Award (A3 pries) weur eerder wunnen deur Pieter Sijpersma, hoofdredacteur van het Dagblad van het Noorden (2005): Streektaolpagina “Schepers erf” en de basisschoel Het Leerhoes in Zwiggelte (2006): Elke week Drèents op schoel. De pries weur in 2007 wunnen deur gedippeteerde Hans Gerritsen van Grunning: vechten veur erkenning van het Nedersaksisch. De Stenden Hogeschoel uut Emmen wun in 2008 met het opzetten van een lesprogramma in de streektaol veur Pabo-studenten. In 2009 wun journalist Jan Wierenga  met zien verhaolen van Lamert Kieft in het Dagblad van het Noorden. En het oflopen jaor gung de pries naor de Noord Nederlandse Reinigings Dienst in Drachten veur heur vier!-taolige webstee.